లే -అవుట్ తో కూడిన ప్రతిపాదనలు పంపాలి – జిల్లా కలెక్టర్ రవినాయక్

లే -అవుట్ తో కూడిన ప్రతిపాదనలు పంపాలి
– జిల్లా కలెక్టర్ జి రవినాయక్
శోధన న్యూస్: శాసనసభ ఎన్నికల ఓట్ల లెక్కింపు కేంద్రాలకు లే- అవుట్ తో సహా ప్రతిపాదనలు సమర్పించాలని జిల్లా కలెక్టర్, జిల్లా ఎన్నికల అధికారి జి రవినాయక్ రిటర్నింగ్ అధికారులను ఆదేశించారు. గురువారం ఆయన మహబూబ్ నగర్ సమీపంలోని ధర్మాపూర్ వద్ద ఉన్న జయప్రకాష్ నారాయణ ఇంజనీరింగ్ కళాశాలలో మహబూబ్ నగర్, జడ్చర్ల దేవరకద్ర అసెంబ్లీ నియోజకవర్గాల ఓట్ల లెక్కింపు కై ఏర్పాట్లను పరిశీలించారు. ఓట్ల లెక్కింపు చేపట్టే హాళ్లు, అలాగే  ఈ వి ఎం లు భద్ర పరిచే స్ట్రాంగ్ రూముల ఏర్పాటుకు అందుబాటులో ఉన్న హాళ్లను కలెక్టర్ పరిశీలించారు. ఓట్ల లెక్కింపు విధులకు నియమించబడిన అధికారులు,సిబ్బంది కౌంటింగ్ కేంద్రాలకు వచ్చేందుకు విడి విడి గా దారులు ఏర్పాటు చేయాలని, అదేవిధంగా అభ్యర్థులు, వారి ఏజెంట్లు వచ్చేందుకు ప్రత్యేక దారులు ఏర్పాటు ఉండాలని, వీటితోపాటు మీడియా ప్రతినిధులు ఓట్ల లెక్కింపు ప్రక్రియ ను కవర్ చేసేందుకై ఏర్పాట్లు చేయాల్సిందిగా అధికారులను ఆదేశించారు. వీటన్నిటిని దృష్టిలో ఉంచుకొని లే- అవుట్ ను రూపొందించి లే -ఆవుట్ తో సహా ప్రతిపాదనలు సమర్పించాల్సిందిగా ఆయన తెలిపారు. మూడు నియోజకవర్గాల ఓట్ల లెక్కింపు ఒకే చోట నిర్వహిస్తున్నందున ఒక నియోజకవర్గానికి సంబంధించిన వారు ఇంకో నియోజకవర్గంలో కలవకుండా ప్రత్యేకమైన ఏర్పాట్లు, ప్రత్యేకదారులు, వసతులు ఉండేలా చర్యలు తీసుకోవాల్సిందిగా అధికారులను ఆదేశించారు.