నామినేషన్ కేంద్రాలను పరిశీలించిన వ్యయ పరిశీలకురాలు
నామినేషన్ కేంద్రాలను పరిశీలించిన వ్యయ పరిశీలకురాలు
మణుగూరు, శోధన న్యూస్ : భద్రాద్రి కొత్తగూడెం జిల్లా పినపాక నియోజక వర్గం మణుగూరు,పినపాక మండలాల్లోని నామినేషన్ కేంద్రాలను ఎన్నికల వ్యయ పరిశీలకురాలు లావణ్య శుక్రవారం సందర్శించి పరిశీలించారు. గ్రామ పంచాయతి ఎన్నికలకు సంబంధించి నామినేషన్ ప్రక్రియ ఆమె ప్రయవేక్షించారు. నామినేషన్ కేంద్రాలకు వచ్చే అభ్యర్థులు నిబంధనలు, మార్గదర్శకాల మేరకు పత్రాలను సమర్పిస్తున్నారా అనే విషయంపై సంబంధిత అధికారులను అడిగి తెలుసుకున్నారు. ఈ సందర్భంగా ఆమె మాట్లాడుతూ గ్రామ పంచాయతి ఎన్నికల్లో అభ్యర్థుల వ్యయ వివరాలు అత్యంత పారదర్శకంగా, నిర్దిష్టంగా నమోదు కావాలని సూచించారు. ఎన్నికల కమిషన్ మార్గదర్శకాల ప్రకారం ప్రతి అభ్యర్థి ప్రత్యేక బ్యాంకు ఖాతా తెరవడం, అన్ని రకాల వ్యయాలు అదే ఖాతా ద్వారా నిర్వహించడం తప్పనిసరి అని గుర్తుచేశారు. వ్యయ లెక్కలను సమయానుకూలంగా సమర్పించకపోతే అభ్యర్థిత్వం రద్దుకు గురయ్యే అవకాశాలు ఉంటాయని ఆమె స్పష్టం చేశారు.అభ్యర్థులు, ఏజెంట్లు ఎన్నికల నిబంధనలు పూర్తిగా పాటించాలని, ఎటువంటి ప్రచార వ్యయం అయినా సరైన రికార్డులతో నమోదు చేయాలని ఆమె సూచించారు. ఈ కార్యక్రమాల్లో ఆయా మండలాల ఎన్నికల అధికారులు తదితరులు పాల్గొన్నారు.
