సికిల్‌సెల్, తలసేమియా రోగుల కోసం ప్రత్యేక వైద్య శిబిరాలు
సికిల్‌సెల్, తలసేమియా రోగుల కోసం ప్రత్యేక వైద్య శిబిరాలు
-భద్రాద్రి కొత్తగూడెం జిల్లా కలెక్టర్ జితేష్ వి పాటిల్
భద్రాద్రి కొత్తగూడెం, శోధన న్యూస్ : భద్రాద్రి కొత్తగూడెం జిల్లాలో సికిల్‌సెల్, తలసేమియా దీర్ఘకాలిక రక్తవ్యాధులతో బాధపడుతున్న రోగుల కోసం ఈ నెల 28–29 తేదీల్లో రెండు రోజుల పాటు ప్రత్యేక వైద్య శిబిరాలను ఏర్పాటు చేసినట్లు జిల్లా కలెక్టర్ జితేష్ వి పాటిల్ తెలిపారు. గురువారం జిల్లా కలెక్ట రేట్ కార్యాలయం లో ఆయన మాట్లాడుతూ.. జిల్లాలోని ప్రతి రోగికి నాణ్యమైన వైద్య సదుపాయాలు అందించాలన్న లక్ష్యంతో శిబిరాలు ఏర్పాటు చేసినట్లు తెలిపారు. ఈ శిబిరాల్లో రోగుల ఆరోగ్య పరిస్థితిని నిర్ధారించడం, అవసరమైతే నిరంతర చికిత్సకు అనుసంధానం చేయడం, కుటుంబ సభ్యులకు అవగాహన కల్పించానున్నట్లు తెలిపారు. 28 న శుక్రవారం ఉదయం 8గంటల నుండి మధ్యాహ్నం 12:30గంటల వరకు దుమ్ముగూడెం మండలం నర్సాపురం రైతు వేదిక (దేవాలయం పక్కనే, ప్రధాన రహదారి, లక్ష్మీనగరం వైపు)లో, మధ్యాహ్నం 2 గంటల నుండి సాయంత్రం 6గంటల వరకు భద్రాచలం రైతు వేదిక (మార్కెట్ యార్డ్‌ )లో నిరావహిస్తున్నట్లు తెలిపారు. 29న శనివారం ఉదయం8గంటల నుండి మధ్యాహ్నం 12:30గంటల వరకు అశ్వారావుపేట మండలం నారాయణపురం గ్రామం అశ్వారావుపేట రైతు వేదిక(నారాయణపురం గ్రామపంచాయతీ కార్యాలయం పక్కన) లో, మధ్యాహ్నం 2 గంటల నుండి సాయంత్రం 6గంటల వరకు చుంచుపల్లి మండలం రామవరం రైతు వేదికలో శిబిరాలు ఏర్పాటు చేసినట్లు తెలిపారు.
హైదరాబాద్‌ నుండి ప్రత్యేకంగా రానున్న నిపుణులైన వైద్యుల బృందం ఈ శిబిరాల్లో రోగుల నిర్ధారణ, వైద్య సలహాలు, అవసరమైన చికిత్స పద్ధతులు వివరించనున్నారన్నారు. సికిల్‌సెల్, తలసేమియా రోగులకు మెడికల్ కార్డుల జారీ, ప్రత్యేక వైకల్య గుర్తింపు కార్డు నమోదు, కౌన్సిలింగ్ సేవలు పూర్తిగా ఉచితంగా అందించబడతాయని కలెక్టర్ తెలిపారు. ఇప్పటికే ఈ వ్యాధులు గుర్తించిన పిల్లల తల్లిదండ్రులు తప్పనిసరిగా తమ పిల్లలను సమీప శిబిరానికి తీసుకురావాలని సూచించారు. గ్రామీణ ప్రాంతాల ప్రజలు కూడా ఈ అవకాశాన్ని సద్వినియోగం చేసుకుని వైద్యుల సూచనలు పొందాలని కోరుతూ, రోగుల ఆరోగ్య రక్షణలో ప్రతి కుటుంబం చురుకైన పాత్ర వహించాలని జిల్లా కలెక్టర్ జితేష్ వి పాటిల్ కోరారు.
